N.E. Balle

Den frie Encyklopædi: N.E. Balle, Nikolaj Edinger Balle, 12.4.1839-13.11.1900, ajoqersuiartortitaq, Kalaallit Nunaanni Seminariami siulittaasoq. In. Olstrup-imi, toq. ilisaasorlu Nuummi. Egedikkut allagaannik atuarnikkut Balle siusissukkut Kalaallit Nunaannut soqutiginnilersinneqarpoq, taakkutullu nunatsinni ajoqersuisunngornissi anguniagassatut siunniuppaa. 1958-imi ilinniarnertuunngorpoq 1864-imilu teologimi kandidatinngorluni. Ilinniarnermi nalaani Grundtvig-imut qanittut ilagaat. 1865-imi palasingortitaareerluni Ilulissani seminariami ilinniartitsisuuvoq, 1867 imi Ilulissani najugaqarluni Uummannami ajoqersuisuuvoq, 1869-imi Seminariami siulittaasuugal-larpoq. 1870-imi Balle Nuummi ajoqersuisunngorpoq Seminariamilu siulittaasun-ngorluni tassaniipporlu toqussi tikillugu. Balle inuttut immikkuullarissuuvoq upperluartuuneralu, ilungersornera anersaakkullu najorlugit suliffigisani qaangeqalugit maleruagassiuinera sunniuteqarpoq. Kalaallit Nunaata Seminaariatuaani siulittaasutut sivisuumik sulisimanera inuusuttut amerlasuut tassannga ilinniarnerminnik naammassinnillutik ajoqinngortut ilinniartitsisunngortullu nunatsinnullu tamarmut siaruaattut, assigiiaartumik ilinniartitaallutillu sunnerneqarput, tamannalu soorunami ilagiinni inuunermut sunniuppoq. Inuunermini suliaa innutaasunut tamanut pingaaruteqarpoq allakkianik qimataqanngingajakkaluaq (quppersagaq ataaseq pissarsinartunik imalik) aqqa kalaallinit amerlasuunit suli eqqaamaneqarpoq. Balle-p eqqartornerani nulia Kathrine Justine Balle taanngitsoorneqarsinnaanngilaq. Taassuma inuuneq tamaat Kalaallit Nunaannut pituttuisuusimanissaa qularnanngilaq, taamatut-taaq innuttaasunik ilisarisimannilluarnerata sulinerani isumassarsissutaasarsimanissaa qularutissaanngilaq. Balle-p erneri marluk angummik Kalaallit Nunaanni palasitut suliaanik nangitsisut tassaapput Frederik Balle aamma  Knud Balle.

%d bloggers like this: